பயனர்களுக்காக ஜியோ வழங்கும் புதிய சலுகை – விருப்பமான ஃபேன்சி மொபைல் எண்களை குறைந்த கட்டணத்தில் தேர்ந்தெடுக்கலாம்!
இந்தியாவின் முன்னணி தொலைத்தொடர்பு நிறுவனங்களில் ஒன்றாக விளங்கி வரும் ரிலையன்ஸ் ஜியோ, தற்போது பயனர்களுக்கு ஒரு சிறப்பு வாய்ப்பை அறிமுகம் செய்துள்ளது. அதாவது, தனக்குப் பிடித்த ஃபேன்சி மொபைல் எண்களை குறைந்த விலையில் தேர்ந்தெடுக்கும் வசதியை வழங்கியுள்ளது.
2016ஆம் ஆண்டில் தனது சேவையை பொதுமக்களுக்கு அறிமுகப்படுத்திய ஜியோ, மிக குறுகிய காலத்திலேயே டெலிகாம் துறையில் மிகுந்த வளர்ச்சி கண்டது. அதன் முதற்கட்ட ரீசார்ஜ் திட்டங்களே இதற்கு முக்கிய காரணமாகும். இன்றும், மற்ற முக்கிய தனியார் தொலைத்தொடர்பு நிறுவனங்களுடன் ஒப்பிடுகையில், ஜியோவின் திட்டங்கள் விலை குறைவாக உள்ளன என்பது குறிப்பிடத்தக்கது.
இந்நிலையில், ஜியோ புதிய சலுகையை தொடங்கி உள்ளது. இதன் மூலம், பயனர்கள் தங்கள் விருப்பப்படி ஏதேனும் ஒரு ஃபேன்சி எண்ணை – உதாரணத்திற்கு, தங்களது தற்போதைய மொபைல் எண், பிறந்த நாள், வாகன பதிவு எண் அல்லது அதிர்ஷ்ட எண்ணை – தேர்ந்தெடுக்க முடியும். இதற்கான சேவைக் கட்டணம் ஆரம்பத்தில் ரூ.500 என இருந்தாலும், தற்போது அதனை ஜியோ வெறும் ரூ.50க்கு வழங்கி வருகிறது.
மேலும், இந்த புதிய எண்ணை தேர்ந்தெடுக்கும் செயல்முறை மிகவும் எளிமையானது. பயனர்கள் “மை ஜியோ” செயலியை பயன்படுத்தி, தங்களுக்கு விருப்பமான எண்ணை தேர்வு செய்யலாம். பின்னர், அந்த எண்ணுடன் கூடிய சிம் கார்டு நேரடியாக வீட்டுக்கே டெலிவரி செய்யப்படும். இந்த புதிய எண், ப்ரீபெய்டு திட்டத்தில் செயல்படுத்தப்படும் என ஜியோ தெரிவித்துள்ளது.
மேலும் தகவல்களுக்கு, ஜியோவின் அதிகாரப்பூர்வ வலைத்தளத்தையும், மை ஜியோ ஆப்பையும் பயனர்கள் அணுகலாம்.
