புதுச்சேரியில் வெப்பம் மீண்டும் சதம் தொட்டது – ஜூலை மாதமே உண்மையான கோடைக்காலம் போல!
புதுச்சேரியில், கோடைக்காலம் முடிந்த பின்னரும் வெப்பம் குறையாமல் தொடர்ந்து அதிகரித்து வரும் சூழலில், ஜூலை 13ம் தேதி (இன்று) இந்த மாதத்தில் வியத்தகு முறையாக ஆறாவது தடவையாக 100 டிகிரியை எட்டியுள்ளது.
இந்த ஆண்டின் ஜூலை மாதம், இதுவரை உண்மையான கோடை மாதமாகவே அனுபவிக்கப்படுகிறது. வானிலை சீராக மாறாமல், வெயில் வலிமை குறையாமல் வெப்பத்தால் மக்கள் அவதிப்படும் நிலை தொடர்ந்து உள்ளது.
இந்த ஆண்டு கோடைக்காலத்தின் தொடக்கத்தில், ஏப்ரல் 12ம் தேதியன்று முதல் முறையாக வெப்பநிலை 100.4 டிகிரிக்கு மேல் சென்றது. இதைத் தொடர்ந்து மே 4ம் தேதி 100.6 டிகிரியாகவும், மே 12ம் தேதி 102.6 டிகிரியாகவும் பதிவானது. பின்னர், சில நாட்களில் ஏற்பட்ட கோடை மழையால் வெப்பம் சற்று தணிந்தது.
கத்தரி வெயிலின் போது, வெப்பம் சதத்தை கடந்தது வெறும் மூன்றே முறைதான். ஆனால், ஜூன் மாதத்தில் நிலை மாறியது. வெப்பம் தொடர்ந்து உயர்ந்தது. ஜூன் 1ம் தேதி 101.5 டிகிரி, ஜூன் 7ம் தேதி 100.8 டிகிரி, ஜூன் 8ம் தேதி ஆண்டின் மிக உயர்ந்த 104 டிகிரி, ஜூன் 9ம் தேதி 100.4 டிகிரி என பதிவு ஆனது. ஜூன் முழுவதும் வெப்பநிலை 97 டிகிரி முதல் 99 டிகிரி வரையிலும் நிலைத்திருந்தது.
மழை பருவம் ஆரம்பமாகும் ஜூலை மாதத்தில் வெப்பம் குறையும் என எதிர்பார்க்கப்பட்டது. ஆனால் நிலமை மாறவே இல்லை. ஜூலை 5ம் தேதி 100 டிகிரி, ஜூலை 8 மற்றும் 9ம் தேதிகளில் 100.6 டிகிரி, ஜூலை 11ம் தேதி 100.2 டிகிரி, ஜூலை 12ம் தேதி 100.4 டிகிரி என தொடர்ச்சியாக சதம் கடந்துள்ளன. இன்று ஜூலை 13ம் தேதி, வெப்பநிலை 101.1 டிகிரியாக உயர்ந்துள்ளது.
இந்த ஆண்டில் ஏப்ரல் மாதத்தில் ஒரு முறையும், மே மாதத்தில் இரு முறையும், ஜூன் மாதத்தில் நான்கு முறையும், ஜூலை மாதத்தில் இப்போது வரை ஆறுமுறையும் வெப்பநிலை 100 டிகிரிக்கு மேல் பதிவாகியுள்ளது. மேலும், ஜூலை 11 முதல் இன்று வரை மூன்று நாட்கள் தொடர்ந்து 100 டிகிரிக்கு மேல் வெப்பம் பதிவானது — இது வெப்பக்காலத்தில் ஒரு ‘ஹாட்ரிக்’ சாதனை எனலாம்.
