டாடா குழுமத்தின் பரிதாப அறிவிப்பு:
அகமதாபாத் விமான விபத்தில் உயிரிழந்தவர்களின் குடும்பத்தினருக்கு தலா ரூ.1 கோடி இழப்பீடு வழங்கப்படும் என டாடா குழுமம் அறிவித்துள்ளது. இந்தத் தகவலை குழுமத் தலைவர் என். சந்திரசேகரன் தெரிவித்துள்ளார்.
இது தொடர்பாக டாடா குழுமத்தின் சமூக வலைதள பக்கத்தில் வெளியிடப்பட்ட தகவலில் கூறப்பட்டுள்ளதாவது: “ஏர் இந்தியா விமானம் விபத்தில் சிக்கிய செய்தி எங்களை ஆழமாக வருத்தமடையச் செய்கிறது. இந்த துயரமான தருணத்தில் எங்களது உணர்வுகளை சொல்வதற்கே வார்த்தைகள் இல்லை. உயிரிழந்தவர்களின் குடும்பங்கள் மற்றும் காயமடைந்தவர்கள் குறித்தே எங்களது எண்ணங்களும் பிரார்த்தனைகளும் உள்ளது. உயிரிழந்த ஒவ்வொரு குடும்பத்திற்கும் ரூ.1 கோடி இழப்பீடு வழங்கப்படுவதுடன், காயமடைந்தவர்களின் சிகிச்சை செலவுகளையும் நாங்கள் ஏற்கிறோம். அவர்களுக்கு தேவையான சிகிச்சை முழுமையாக அளிக்கப்படும். மேலும் விபத்தில் சேதமடைந்த பி.ஜே மருத்துவக் கல்லூரி விடுதியின் மறுசீரமைப்பிலும் எங்களது பங்களிப்பு இருக்கும்” என்று குறிப்பிடப்பட்டுள்ளது.
குறிப்பிடத்தக்கது என்னவெனில், ஏர் இந்தியா லிமிடெட் நிறுவனம் தற்போது டாடா குழுமத்தின் கீழ் இயங்குகிறது. 2021 ஆம் ஆண்டு ரூ.18,000 கோடிக்கு இந்த நிறுவனத்தை டாடா குழுமம் வாங்கியது. அதன் பிறகு 2022 ஆம் ஆண்டில் இருந்து ஏர் இந்தியா நிறுவனத்தின் முழுப்பூரண உரிமையும் டாடா குழுமத்திற்கு வந்தது.
விபத்தின் விவரம்:
ஜூன் 12ஆம் தேதி மதியம் 1.38 மணிக்கு அகமதாபாத்திலிருந்து லண்டன் நோக்கி புறப்பட்ட ஏர் இந்தியா நிறுவனத்தின் போயிங் 787-8 ரக விமானம் புறப்பட்ட சில நிமிடங்களிலேயே சுமார் 600 அடி உயரத்திலிருந்து கீழே விழுந்து வெடித்து விபத்தில் சிக்கியது. இந்த விமானத்தில் மொத்தம் 242 பயணிகள் மற்றும் பணியாளர்கள் இருந்தனர். இதில் 169 பேர் இந்தியர்கள், 53 பேர் பிரிட்டிஷ் பிரஜைகள், ஒருவர் கனடாவைச் சேர்ந்தவர் மற்றும் 7 பேர் போர்ச்சுகீசர்கள் ஆவர்.
விமானம் விழுந்த இடம் பி.ஜே மருத்துவக் கல்லூரி வளாகம் என்பதால் அங்கு பயிலும் மருத்துவ மாணவர்களும் பாதிக்கப்பட்டுள்ளனர். இந்த பயங்கரமான விபத்தில் சுமார் 200 பேர் உயிரிழந்துள்ளதாக குஜராத் மாநிலக் காவல் துறை தெரிவித்துள்ளது. காயமடைந்தவர்கள் மருத்துவமனையில் சிகிச்சை பெற்று வருகின்றனர். இந்த சம்பவம் நாடு முழுவதும் மிகுந்த அதிர்ச்சியையும் சோகத்தையும் ஏற்படுத்தியுள்ளது.
