தமிழக லஞ்ச ஒழிப்பு அமைப்பை வலுப்படுத்தும் வகையில் ஆறுவாரம் காலத்திற்குள் நடவடிக்கை எடுக்க வேண்டும் என உயர்நீதிமன்றம் தமிழக அரசுக்கு கடுமையான உத்தரவு பிறப்பித்துள்ளது.
மதுரை மாவட்டத்தில் எழுமலை நகரைச் சேர்ந்த மலர்விழி என்பவர் தாக்கல் செய்த மனுவில், அவரது கணவர் கடந்த 2022-ஆம் ஆண்டு உயிரிழந்ததாகவும், அதிகாரிப்பட்டி கிராமத்தில் தமது பாரம்பரிய சொத்துகள் இருப்பதாகவும் குறிப்பிடப்பட்டுள்ளது. அந்தச் சொத்துகள், சட்டவிரோதமாக மற்றும் மோசடியான முறையில் பட்டா மாற்றம் செய்யப்பட்டதாக அவர் புகார் அளித்துள்ளார்.
இந்த மோசடியில், தில்லையம்பல நடராஜன் என்ற நபர் சில வருவாய் துறை அதிகாரிகளுடன் கூட்டாக செயல்பட்டு, சொத்து பட்டாக்களை கையாடியதாகக் கூறப்படுகிறது. இதை சீர்செய்ய விரும்பிய மலர்விழி, சம்பந்தப்பட்ட வருவாய் அதிகாரிகளை சந்தித்தபோது ரூ.2 லட்சம் லஞ்சம் கேட்டதாகவும், பல்வேறு கட்டங்களாக அந்தத் தொகையை வழங்கியதாகவும் மனுவில் குறிப்பிட்டுள்ளார்.
மலர்விழி மேலும் தெரிவித்தது: அதிகாரிப்பட்டி கிராம நிர்வாக அலுவலரின் மனைவிக்கு, ஜீ-பே பயன்பாட்டின் மூலம் ரூ.45,000 அனுப்பிய பின்பும், அதிகாரிகள் இன்னும் பணம் கோரியதால், அவர் நேரடியாக லஞ்ச ஒழிப்புத் துறையில் புகார் அளித்துள்ளார். இந்த புகாரின் அடிப்படையில், பேரையூர் வட்டாட்சியர், எழுமலை சார்-பதிவாளர், அதிகாரிப்பட்டி வருவாய் ஆய்வாளர் மற்றும் கிராம நிர்வாக அலுவலர் ஆகியோரின் மீது நடவடிக்கை எடுக்க உத்தரவிடவேண்டும் என அவர் கோரிக்கை வைத்துள்ளார்.
இந்த வழக்கு, நீதிபதி பி. புகழேந்தி அவர்களால் விசாரணைக்கு எடுத்துக்கொள்ளப்பட்டது. மனுதாரர் சார்பில் வழக்கறிஞர் எஸ். வாஞ்சிநாதன் வாதிட்டார். அதற்குப் பதிலளித்த லஞ்ச ஒழிப்புத் துறை, அரசு ஊழியர்கள் மீது வழக்குப் பதிய அரசு முன்பாக அனுமதி பெற வேண்டும் என்பதால், புகாரை மாவட்ட ஆட்சியருக்கு அனுப்பியதாக விளக்கமளித்தது. மேலும், புகாருடன் தேவையான வங்கி பரிவர்த்தனை விவரங்கள் மற்றும் ஆதாரக் கோப்புகள் இணைக்கப்படவில்லை என்றும் தெரிவித்தது.
இதற்கு பதிலளித்த நீதிபதி கூறியதாவது:
“லஞ்சம் கேட்பதும் பெறுவதும் ஒரு மிகப்பெரிய குற்றமாகும். இதுபோன்ற புகார்கள் வந்தவுடன், அவற்றை முறையாக விசாரிக்க வேண்டும். புகாராளரிடம் இருந்து ஆவணங்களை பெற முயற்சிக்காமல், வெறும் முறையீட்டை மாவட்ட ஆட்சியரிடம் மாற்றுவது ஓர் இயந்திர செயல்பாடாகும். இது சட்டத்திற்கு எதிரானதும், ஏற்க முடியாததும் ஆகும்.
புகாரில் ஜீ-பே மூலமாக பணம் வழங்கப்பட்டதாகக் கூறப்பட்டுள்ளது. அதனை ஆய்வு செய்திருந்தால் உண்மை வெளிவந்திருக்கும். ஆனால், அதனை செய்யாமல், நேரடியாக மாவட்ட நிர்வாகத்திடம் புகாரை மாற்றியிருப்பது தவறான நடவடிக்கையாகும்.
லஞ்ச ஒழிப்புத் துறை ஒரு செயல் உறுப்பாக இருக்க வேண்டும்; ஒரு தபால் அலுவலகம் போல அலசாமல் செயல்பட வேண்டும். ஆவணங்கள் இணைக்கப்படவில்லை என்பதற்காக ஒரு வழக்கை நிராகரிக்க முடியாது. உண்மையை கண்டறிய அதிகாரிகளிடம் விசாரணை நடத்தும் மற்றும் ஆதாரங்களை சேகரிக்கும் பொறுப்பு இருக்கிறது.”
மேலும், நீதிபதி தொடர்ந்தார்:
“தமிழக லஞ்ச ஒழிப்பு அமைப்பின் தற்போதைய நிலையில் மொத்தமாக 611 பணியிடங்கள் ஒதுக்கப்பட்டுள்ளன. ஆனால், தற்போது வெறும் 541 ஊழியர்களே பணியாற்றி வருகின்றனர். அதேசமயம், தமிழகத்தில் 16.93 லட்சம் அரசு ஊழியர்கள் உள்ளனர். ஆண்டுக்கு சுமார் 15,000 லஞ்ச புகார்கள் வருகிறது. இவ்வளவு பெரிய அளவிலான புகார்களை ஆய்வு செய்ய, தற்போதுள்ள ஊழியர்கள் போதுமானதாக இல்லை.
எனவே, தமிழக அரசு இந்த அமைப்பை பலப்படுத்தும் நோக்கில், ஊழியர்களின் எண்ணிக்கையை அதிகரிக்கவும், தேவையான கட்டமைப்பு வசதிகளை மேம்படுத்தவும், ஆறு வாரங்களுக்குள் உடனடியாக நடவடிக்கை எடுக்க வேண்டும். ஏனெனில், ஊழலுக்கு எதிரான செயல்பாடு என்பது விருப்பத்திற்குரிய ஒன்று அல்ல. அது இந்திய அரசியலமைப்பின் கட்டாய பாகமாகும்.”
அத்துடன் நீதிபதி கூறிய உத்தரவின் முடிவில்:
“மனுவில் குறிப்பிடப்பட்டுள்ள பட்டா மாறுதல் சம்பவம் மிகுந்த சந்தேகத்துக்குரியதாக உள்ளது. கிராம நிர்வாக அலுவலர் மீது நடவடிக்கை எடுக்கப்பட்டாலும், அவரை மட்டும் பலிகடா ஆக்க முடியாது. இது ஒரே நபரின் செயல் அல்ல.
எனவே, முழுமையான விசாரணை நடத்தி, இதில் தொடர்புடைய அனைத்து அதிகாரிகளையும் அடையாளம் கண்டறிந்து, அவர்கள்மீதும் உரிய நடவடிக்கை எடுக்க வேண்டும். மலர்விழியின் புகாரின் அடிப்படையில், லஞ்ச ஒழிப்புத் துறை வழக்குப் பதிவு செய்து உடனடி நடவடிக்கை எடுக்க வேண்டும்.”
